ઘૂંઘટકા પટ ખોલ રે (૬)

આરતી અઢારમા વર્ષમાં આવી. અસ્મિતા સોળ જ વર્ષની હતી. બાળપણમાં બે બહેનોની ઉંમરમાં જે ફરક ન વર્તાતો તે હવે વરતાવા લાગ્યો. આરતી ઝડપથી મોટી થતી હોય એમ લાગવા માંડ્યું. આરતીને પણ યૌવનના આછા આછેરા અનુભવો થવા લાગ્યા. આરતીના સગપણની વાતો એનાં માબાપ ક્યારનાંય કરવા માંડ્યાં હતાં એ અસ્મિતાના ધ્યાનમાં ઝટ આવી ગયું. આરતીને એનો આછો ખ્યાલ આવેલો પણ એની કંઈ અસ્પષ્ટ વાત સાંભળતાંય એના ગાલે શરમના શેરડા પડતા, અને મુખ પર લજ્જાથી સાડી જરા સરકી નાનકડો ઘૂંઘટ બનાવતી!